Misir: ABŞ-nin birtərəfli ticarət siyasəti qlobal iqtisadiyyata zərbə vurur

"ABŞ-nin tətbiq etdiyi birtərəfli proteksionist siyasət, xüsusilə gömrük rüsumları ilə bağlı qərarlar, qlobal iqtisadiyyata zərər verir, beynəlxalq təchizat zəncirlərini pozur və maliyyə bazarlarında qeyri-sabitlik yaradır".   

TodayPress xəbər verir ki, bu barədə Qahirədə yerləşən Al Adl İqtisadi və Strateji Tədqiqatlar Mərkəzinin rəhbəri Karim Adel "Sinxua" agentliyinə müsahibəsində bildirib. 

Onun sözlərinə görə, Tramp administrasiyasının həm müttəfiqlərinə, həm də rəqib adlandırdığı ölkələrə qarşı tətbiq etdiyi gömrük rüsumları dünya üzrə müəssisələrin əməliyyat və istehsal xərclərinin artmasına, həmçinin mövcud qlobal təchizat zəncirlərinin pozulmasına səbəb olacaq. 

Misir iqtisadiyyatının xammal, yarımfabrikat və hazır məhsulların idxalına əsaslandığını vurğulayan ekspert, bu səbəbdən ölkənin artan idxal xərcləri ilə ciddi təsirlənəcəyini qeyd edib. 

Bununla belə, Adel Misirin bu mənfi təsirləri azaltmaq üçün Çin kimi ölkələrlə tərəfdaşlıqları gücləndirmək imkanına malik olduğunu vurğulayıb. O bildirib ki, Misir və Çin arasındakı ikitərəfli əlaqələr dinamik və məhsuldardır və bu əməkdaşlıq bir çox sektoru əhatə edir. 

O, həmçinin vurğulayıb ki, “Bir Kəmər, Bir Yol” təşəbbüsü və BRİKS kimi platformalar vasitəsilə Çin öz iqtisadi gücündən istifadə edərək ABŞ-nin birtərəfli qərarlarının yaratdığı ticarət və maliyyə böhranlarını yumşaltmaqda digər ölkələrə dəstək ola bilər. 

Sonda ekspert bildirib ki, xüsusilə Qlobal Cənub ölkələri ABŞ-nin siyasətinin mənfi təsirlərini azaltmaq üçün əməkdaşlıq səylərini fəallaşdırmalıdır. 

Töhfə Səməd