İsrail hökuməti HƏMAS-la atəşkəs razılaşmasını təsdiqlədi

İsrailin Hərbi-Siyasi Kabineti HƏMAS-la atəşkəs və girovların azad edilməsi ilə bağlı razılaşmanı təsdiqləyib.

TodayPress xəbər verir ki, bu barədə İsrailin Baş naziri Benyamin Netanyahunun ofisi məlumat yayıb. 

Komitə hökumətə bu razılaşmanı təsdiqləməyi tövsiyə edib. 

Plana uyğun olaraq, hökumət tərəfindən təsdiqləndikdən sonra tərəflər yanvarın 19-dan 42 gün müddətinə hərbi əməliyyatları dayandıracaqlar. 

Müqavilənin bazar günü qüvvəyə minəcəyi gözlənilir. 

Birinci mərhələ min fələstinli məhbusun əvəzində 33 israilli girovun azad edilməsini nəzərdə tutur.

İsrail əsgərləri atəşkəs müddəti ərzində orada qalacaqları Qəzza zolağının sərhədlərinə çəkiləcək. Sektora çatdırılan humanitar yardımın həcmi də artırılacaq.  Vasitəçi ölkələr (Qətər, Misir və ABŞ)  sazişin icrasına zəmanət vermək üçün Qahirədə koordinasiya mərkəzi yaradacaqlar.

Atəşkəsin 16-cı günündə tərəflər qalan girovların azad edilməsi, daimi atəşkəs və İsrail qoşunlarının tamamilə çıxarılmasını əhatə edən ikinci mərhələ üzrə danışıqlara başlayacaq.

Qalıqların mübadiləsi, Qəzza zolağının yenidən qurulması və blokadanın aradan qaldırılmasını əhatə edən üçüncü mərhələ də nəzərdən keçirilir.

Qeyd edək ki, bu, münaqişə başlayandan bəri ikinci atəşkəsdir: 2023-cü ilin noyabrında bağlanan birinci barışıq altı gün davam edib.   

Günəş Mərd