İranda hökumət 12 güneyli milli fəala 88 il həbs cəzası verdi

İranda hökumət 12 güney azərbaycanlı fəalı 88 il müddətinə azadlıqdan məhrum edib.

TodayPress “Azad İran”a istinadən xəbər verir ki, bu barədə Güney Azərbaycan Demokratik Türk Birliyi (GADTB) məlumat yayıb.

Bildirilib ki, qəddarlığı ilə tanınan hakim Əbülqasım Səlavatinin sədrlik etdiyi Tehran İnqilab Məhkəməsinin 15-ci bölməsi 12 güneyli milli fəala ümumilikdə 88 il həbs cəzası verib.

Qeyd olunub ki, onların həbsdən sonra iki il müddətinə ictimai və siyasi fəaliyyətlərinə, eləcə də partiyalara üzvlüyünə də qadağa qoyulub. “Daxili və xarici təhlükəsizliyə qarşı toplaşmaq və əlbir olmaq”, “dövlət quruluşu əleyhinə təbliğar aparmaq” və “casusluq”da günahlandırılan Bağır Hacızadə 13 il, Ayaz Seyfxah 13 il, Araz Amani 13 il, Vədud Əsədi 9 il 6 ay, Əbdüləziz Əzimi Qədim 6 il, Murtuza Pərvin 6 il, Tahir Nəqəvi 6 il, Salar Tahir Əfşar 5 il, Hüseyn Piri 5 il, Səid Minayi 5 il, Kamal Nuri 3 il və Süleyman Məhəmmədi 3 il müddətinə azadlıqdan məhrum ediliblər.