Hindistanlı qadının ölümünü ələ salan ABŞ polisi işdən çıxarıldı

Ötən il həyatını itirən hindistanlı tələbənin həyatının "məhdud dəyərdə" olduğunu deyən ABŞ polisi işdən qovulub.

TodayPress xəbər verir ki, Sietl Polis Departamenti zabit Daniel Odererin Cahnavi Kandulanın ölümü ilə bağlı şərhlərinin "alçaq" və "qəddarca" olduğunu açıqlayıb.

23 yaşlı Kandula yanvar ayında universitetinin yaxınlığındakı küçədən keçərkən başqa bir polis maşını tərəfindən vurularaq həyatını itirmişdi.

Danielin həmkarına zəng edərək hadisə barədə danışdığı anlar bədən kamerasında əks olunub.

O dialoq zamanı gülərək “Amma o ölüb. Yox, adi bir adamdır. Sadəcə çek yaz” ifadələrini işlədib.

“On bir min dollar. Onun 26 yaşı var imiş. Onsuz da dəyəri məhdud idi” deyə Daniel deyib.

Video sosial şəbəkələrdə geniş yayılıb və internetdə etirazlara səbəb olub.

Sietl Polis Departamentinin müvəqqəti rəisi Syu Rar departamentin elektron poçtu vasitəsilə polisin işdən çıxarılmasını elan edib.

Onun hərəkətləri bütün şöbəni və polis peşəsini utandırdı, deyə o yazıb.

Qeyd edək ki, Daniel Oderer hadisədən sonra istintaqa cəlb edilmişdi.

Nəzrin Cavadzadə