Gürcüstanda seçkidə saxtakarlıqla bağlı cinayət işi açıldı

Gürcüstan Mərkəzi Seçki Komissiyasının rəhbəri Giorgi Kalandarişvili bülletenlərin topa halında atılması şübhəsi ilə bağlı respublikanın Daxili İşlər Nazirliyinin cinayət işi açdığını bildirib.

TodayPress xəbər verir ki, bu barədə “TASS” məlumat yayıb. 

Araşdırmaya səbəb Tbilisi yaxınlığındakı Kvemo Kartli bölgəsinin Marneuli rayonundakı 69 saylı seçki məntəqəsindən yerli telekanallar tərəfindən yayılan video olub. Qurum rəsmisi ictimaiyyətə obyektiv məlumat vermək üçün polisdən lazımi prosedurların tez bir zamanda həyata keçirilməsini xahiş edib.

Kalandarişvili həmçinin Marneuli dairə seçki komissiyasından təcili iclas keçirməyi və vəziyyətə aydınlıq gətirməyi tələb edib. Onun sözlərinə görə, belə hallar seçki mühitinə xələl gətirir və səsvermənin nəticələri ilə bağlı suallar yaradır.

Müxalifətçi Eka Qiqaurinin yayımladığı videoda döş nişanları olan naməlum şəxslərin bülletenləri topa halında tələsərək qutulara doldurduğu və yaxınlıqda oturan məntəqə seçki komissiyasının nümayəndələrinin onlara mane olmadığı görünür. Hadisənin şahidləri bildiriblər ki, bu hərəkətlərdən sonra ərazidə dava düşüb.

Töhfə Səməd