FT: Panama hakimiyyəti Trampdan qorxur

Panama hakimiyyəti ABŞ prezidenti Donald Trampın Panama kanalına nəzarəti bərpa etmək üçün hərbi güc tətbiq edəcəyindən qorxur. 

TodayPress xəbər verir ki, bu barədə “The Financial Times” (FT) məlumat yayıb.

“Biz narahatıq. Ordusu və praktiki cəhətdən müharibə təcrübəsi olmayan bir ölkəyə qarşı Tramp hər şeyi edə bilər” deyə adı açıqlanmayan yüksək rütbəli Panama rəsmisi nəşrə deyib.

Tramp hətta Ağ Evə rəhbərlik etdiyi ilk müddətdə (2017-2021) kanal ətrafındakı vəziyyətdən narazılığını bildirib. Bu, xüsusilə, su yolundan keçən gəmilər üçün tariflərə aiddir.

Xatırladaq ki, Ağ Evin yeni lideri yanvarın 20-də inauqurasiya nitqində Panama kanalını “geri almaq” niyyətini açıqlayıb. 

Panama prezidenti Xose Raul Mulino isə qeyd edib ki, kanal üzərində suverenlik və ölkənin müstəqilliyi ilə bağlı danışıqlar aparıla bilməz. "Politico" yazır ki, Tramp Panama kanalının mülkiyyətinə dair ölkəsinə təzyiqi dayandırmasa, Mulino BMT Təhlükəsizlik Şurasına müraciət etmək qərarına gələ bilər.

Qeyd edək ki, 1914-cü ildə istismara verilən gəmi kanalı ABŞ tərəfindən tikilib və idarə olunub. 1977-ci ildə Torrixos-Karter Müqaviləsi 1999-cu ildə tamamlanan kanalın mərhələli şəkildə Panamaya köçürülməsini müəyyən edib. Müqavilə kanalın neytral statusunu və dünya ticarətinin maraqları baxımından əlçatanlığını nəzərdə tutur. Bu gün o qlobal iqtisadiyyatın ən mühüm marşrutu və ABŞ-nin maraqlarının əsas obyektlərindən biri olaraq qalır. 

Töhfə Səməd