“Beril” fırtınası Texasda üç nəfərin ölümü, 2.7 milyon insanın işıqsız qalması ilə nəticələndi

Karib dənizində yaranmış “Beril” qasırğası Texasın cənub-şərqində ən azı üç nəfərin ölümünə, magistral yolları su basmasına, neft limanlarının bağlanmasına, 1300-dən çox uçuşun ləğvinə və 2,7 milyondan çox ev və müəssisənin elektrik enerjisinin kəsilməsinə səbəb olub.

TodayPress xəbər verir ki, ABŞ Milli Qasırğa Mərkəzinin (NHC) məlumatına görə, mövsümün ən erkən “5-ci Kateqoriya” qasırğası sayılan “Beril”, Texasın sahilindəki Mataqorda şəhərini  təhlükəli tufan dalğaları və güclü yağışla vurduqdan sonra zəifləyib və ardınca Hyustona doğru hərəkət edib. Agentlik bildirib ki, şərait Texas, Luiziana və Arkanzasda tornadolara səbəb ola bilər.

Ölkənin içərilərinə doğru irəlilədikcə sürətlə zəifləməsi gözlənilən fırtına ötən həftə Yamayka, Qrenada və Sent Vinsent və Qrenadin adalarında dağıdıcı bir yol keçib. Karib hövzəsi və Texasda ən azı 12 nəfərin ölümünə səbəb olub.

Texasda 53 yaşlı kişi və 74 yaşlı qadın bazar ertəsi Hyuston bölgəsində evlərinin üzərinə ağacların aşması nəticəsində həlak olub. Yerli rəsmilərin məlumatına görə, üçüncü şəxs isə boğularaq ölüb.

Nəzrin Cavadzadə