Aİ-də LNG idxalı rekorda çatdı

Mart ayında Avropa İttifaqının (Aİ) qaz nəqliyyat sisteminə rekord həcmdə mayeləşdirilmiş təbii qaz (LNG) daxil olub. 

TodayPress xəbər verir ki, bu barədə “Gas Infrastructure Europe” (GIE) təşkilatının məlumatlarına istinadən “TASS” yazıb.

Hesabat ayı üzrə Avropa terminallarından Aİ-nin qaz nəqliyyat sisteminə ötürülən LNG-nin həcmi təxminən 12,7 milyard kubmetr təşkil edib.

Bu göstərici fevral ayı ilə müqayisədə 17%, 2024-cü ilin martı ilə müqayisədə isə 19% artım deməkdir.

Beləliklə, bu rəqəm müşahidə tarixində ən yüksək göstərici olub. Əvvəlki rekord 2023-cü ilin mayında – 12,2 milyard kubmetr səviyyəsində qeydə alınmışdı.

Ümumilikdə yanvar-mart aylarında Aİ qaz nəqliyyat sisteminə 34 milyard kubmetrə yaxın LNG daxil olub ki, bu da ötən ilin eyni dövrü ilə müqayisədə 9,6% çoxdur.

Qeyd edək ki, fevral ayında Avropa İttifaqı Rusiya mənşəli LNG-nin birləşmiş sistemə qoşulmamış terminallar vasitəsilə idxalını qadağan etmişdi.

Avropa Komissiyasının sədri Ursula fon der Lyayen isə daha öncə bəyan etmişdi ki, Aİ Rusiya qazından imtina etməlidir və bu ölkənin “mavi yanacaq” ticarətinə imkan verən boşluqlar aradan qaldırılmalıdır. 

Qiymət Mahir