Aİ-dan Macarıstana cərimə - Hər gün 1 milyon avro

Avropa İttifaqı administrasiyası ilə bir çox mövzuda razılığa gələ bilməyən Aİ üzvü Macarıstan qaçqınlarla bağlı nizamnaməyə əməl etmədiyi üçün Aİ-nın ən yüksək səlahiyyətli məhkəməsi tərəfindən 200 milyon avro cərimələnib.

TodayPress xəbər verir ki, Aİ-nın ən yüksək məhkəməsi Macarıstanın 2020-ci il qərarında tələb olunan miqrasiya siyasətində lazımi tədbirləri həyata keçirmədiyi üçün 200 milyon avro, bu qərarları tam yerinə yetirənə qədər isə hər gün 1 milyon avro cərimə ödəməli olduğuna qərar verib.

Xatırladaq ki, Macarıstan uzun müddətdir ki, ölkələrin mühacirləri qəbul etmək və ya onların qayğısına qalmaq öhdəliyinə qarşı çıxıb.

Aİ-nın sığınacaq sisteminin uğursuz olması ilə bağlı tənqidlərdən sonra Aİ ölkələri sistemdə hərtərəfli islahatlar aparıb, Macarıstan və Polşadan başqa ölkələr isə islahatları təsdiqləyib.

Macarıstanın Baş naziri Viktor Orban parlamentdəki səsvermədən sonra verdiyi açıqlamada, "Miqrasiya Paktı Avropa Birliyinin tabutuna başqa bir mismardır. Birlik ölüb, təhlükəsiz sərhədlər artıq mövcud deyil. Macarıstan heç vaxt hökumətin qarşısında boyun əyməyəcək" deyib.

Ən mühüm islahat “məcburi həmrəylik” sistemidir ki, bu da hökumətlərə qaçqınları idarə etmək üçün üç seçim imkanı verəcək. Bu sistemə görə, müəyyən sayda sığınacaq axtaran şəxs başqa yerə köçürülə bilər və hər rədd edilmiş sığınacaq axtaran şəxs üçün 20 min avro ödəmək və ya əməliyyat dəstəyini maliyyələşdirmək öhdəliyi var.

GÜNEL