19-cu əsrə aid gəminin qalıqlarından 100-dən çox şampan şüşəsi çıxarıldı

Baltik dənizində dalğıclar içərisi şampan, şərab, mineral su və çini ilə yüklənmiş 19-cu əsrə aid yelkənli gəminin qalıqlarını tapıblar.

TodayPress xəbər verir ki, gəminin içərisində 100-dən çox şampan şüşəsi olub.

Tapıntı İsveçin Oland adasından təxminən 37 km cənubda aşkar edilib.

Üzərində Alman şirkəti “Selters”in adı qeyd olunmuş gil su şüşələri dağıntının 1850-1867-ci illərə aid olduğunu üzə çıxarıb.

Dalğıc komandasının lideri Staçura qeyd edib ki, bu gün şampan şüşələri insanları daha çox maraqlandırsa da, mineral su həmin vaxt demək olar ki, dərman kimi istifadə olunan eksklüziv məhsul olub və yalnız kral süfrələrinə yol tapıb.

"Onun dəyəri o qədər çox idi ki, nəqliyyat vasitələri polis tərəfindən müşayiət olunurdu" o əlavə edib.

Cənab Staçura “BBC”-yə açıqlamasında bildirib ki, o, malların 1852-ci ildə bölgədə gəmilərindən birini itirdiyi bildirilən Rusiya çarı I Nikolayın süfrəsi üçün nəzərdə tutulduğuna inanır.

"Bu, gəminin niyə bu qədər eksklüziv yüklərə sahib olduğunu izah edir”.

Nəzrin Cavadzadə