Taksi sürücüləri etiraza hazırlaşır? – AYNA və sürücülər üz-üzə gəldi

Məlumata görə, Bakı şəhərində fəaliyyət göstərən taksi sürücüləri aprel ayının 2-si tətil elan edəcəklər. Onların əsas tələbləri taksi dayanacaqlarının sayının artırılması, sərnişin mindirib-düşürmək üçün taksi sürücülərinə avtobus zolaqlarından istifadə etməyə icazə verilməsi, minimum qiymətə maksimum məsafə həddinin müəyyənləşdirilməsidir. 

Nəqliyyat eksperti Eldəniz Cəfərov bu barədə TodayPress-ə danışarkən bildirib ki, hazırda  taksi sürücülərinin hüquqlarını qorumaq üçün hər birimiz çalışmalıyıq və müvafiq qurumlar da onların  tələblərinin yerinə yetirilməsinə kömək etməlidirlər:     

Ekspert məsələdə məhz taksi şirkətlərinin günahkar olduğunu bildirib.   

“Taksi sürücülərinin üç əsas problemi var. Birincisi taksi şirkətlərinin onlara qeyri-nağd ödəmələrinin vaxtında verməməsidir və bu səbəbdən də taksi sürücüləri ilə sərnişinlər arasında problemlər yaşanır. Onlar bəzən buna görə nağdsız sifarişlərdən imtina edirlər.   İkinci səbəb, taksi şirkətlərinin taksi sürücülərinin hüquqlarını tapdalamasıdır. Onları sutka ərzində normadan çox işlədirlər. Hətta sürücülər müəyyən şirnikləndirici kampaniyalarla 14-16 saat işləməli olurlar. Digər tərəfdən, taksi şirkətlərinin taksi sürücülərindən aldığı komisyon haqlarıdır ki, bu 25 faizə qədər yüksəlib”.   

Ekspert əlavə edib ki, əgər həqiqətən də taksi sürücüləri öz rifahlarını düşünürlərsə, o zaman  taksi şirkətləri qarşısında bu məsələləri qaldırmalıdırlar. Qurumlar tərəfindən isə birmənalı olaraq onlara əlverişli şərait yaradılmalıdır.     

Azərbaycan Yerüstü Nəqliyyat Agentliyindən (AYNA) TodayPress-in sorğusuna cavab olaraq bildirilib ki, məsələ araşdırılır. Hər hansı nəticə əldə olunarsa, ictimaiyyətə məlumat veriləcək.   

Türkan İsgəndərli